ՀՀ անկախության 30-ամյակի կապակցությամբ նիդերլանդացի գործարարներին ներկայացվեցին Հայաստանի ներդրումային միջավայրը և տնտեսական ներուժը

21 սեպտեմբերի, 2021

Սեպտեմբերի 21-ին դեսպանության և Էյնդհովենում ՀՀ պատվավոր հյուպատոս Վիլլի ֆան դե Կերկհոֆի նախաձեռնությամբ Նիդերլանդների ՏՏ կենտրոն համարվող Ֆելդհոֆեն քաղաքում տեղի ունեցավ ՀՀ անկախության 30-ամյակին նվիրված հայաստանյան ներդրումային միջավայրի վերաբերյալ շնորհանդես, որն առցանց եղանակով իրականացրեց Էնթերփրայզ Արմենիան։

Միջոցառմանը բացման խոսքով հանդես եկան դեսպան Տիգրան Բալայանը և պատվավոր Հյուպատոս Վիլլի ֆան դե Կերկհոֆը։

Տ. Բալայանը ներկաներին պատմեց անկախությունից ի վեր Հայաստանի երեսնամյա անցած ճանապարհի, ունեցած դժվարությունների, պետական կառավարման ոլորտում և տնտեսությունում իրականացվող ընթացիկ բարեփոխումների, հայ-նիդերլանդական դարավոր կապերի, ներկայիս փոխգործակցության և հեռանկարների մասին։

Այնուտեհև Էնթերփրայզ Արմենիայի գործընկերները տեսակապի միջոցով հյուրերին ներկայացրեցին Հայաստանի ընդհանուր ներդրումային միջավայրը, օրենսդրական դաշտը, Հայաստանի և Նիդերլանդների միջև երկկողմ տնտեսական հարաբերությունների ներկա մակարդակը, ՀՀ տարածքով ավելի մեծ շուկաներ մուտք գործելու հնարավորությունները։

Առցանց շնորհանդեսի ավարտին ներկաներին բաժանվեցին նաև Հայաստանում տնտեսական գործունեության և ներդրումային հնարավորությունների վերաբերյալ տեղեկատվական նյութեր։

Ներկայացումից հետո տեղի ունեցավ ընդունելություն։

Միջոցառմանը ներկա էին Նիդերլանդների մեքենաշինական, բժշկական սարքավորումների արտադրության, տեղեկատվական տեխնոլոգիաների և գյուղատնտեսության ոլորտի առաջատար ընկերությունների ղեկավարներ և ներկայացուցիչներ, խորհրդարանի ներկա և նախկին պատգամավորներ, տեղական իշխանությունների ներկայացուցիչներ, գործարարներ, սպորտի ասպարեզում անվանի անձինք։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր